ప్రభాస్ బర్త్‌డే ట్రీట్.. ‘ఫౌజీ’ నుంచి ఇంటెన్స్ పోస్టర్.. ‘అతను ఎవరు?’ అంటూ ఆసక్తి పెంచిన మేకర్స్!

నేడు ప్రభాస్ పుట్టినరోజు సందర్భంగా ఆయన అభిమానులకు అదిరిపోయే సర్‌ప్రైజ్ ఇచ్చింది ‘ఫౌజీ’ చిత్ర బృందం. ప్రభాస్ నటిస్తున్న ఈ చారిత్రక డ్రామా నుంచి ఓ కొత్త పోస్టర్‌ను తాజాగా విడుదల చేసింది. సైనికుడిగా ప్రభాస్ ఇంటెన్స్ లుక్‌ను పరిచయం చేస్తూ, "అతను ఎవరు?" అనే ప్రశ్నకు సమాధానంగా ఓ వీడియోను కూడా విడుదల చేయనున్నట్లు ప్రకటించి అంచనాలను పెంచేసింది.

విడుదల చేసిన ఈ కొత్త పోస్టర్ పాతకాలం నాటి వింటేజ్ డిజైన్‌తో ఆకట్టుకుంటోంది. అగ్ని కీలల మధ్యలో ఉన్న ఓ బంగారు నాణెంపై మిలటరీ యూనిఫాంలో ఉన్న ప్రభాస్ సైడ్ ప్రొఫైల్‌ను ఎంతో పవర్‌ఫుల్‌గా చూపించారు. పోస్టర్‌పై "ఫైల్ నెం: #25 డిక్లాసిఫై చేస్తున్నాం", "ఒంటరిగా పోరాడే బెటాలియన్", "1939 నుంచి మోస్ట్ వాంటెడ్" వంటి క్యాప్షన్లు సినిమాపై క్యూరియాసిటీని మరింత పెంచుతున్నాయి. ఈ పోస్టర్‌కు "ఫైల్ నెం: #25 డిక్లాసిఫై చేస్తున్నాం. 'అతను ఎవరు?' అనే ప్రశ్నకు ఈరోజు వీడియోతో సమాధానం దొరుకుతుంది. హ్యాపీ బర్త్‌డే, #ఫౌజీ" అని క్యాప్షన్ జోడించారు.

‘సీతారామం’ వంటి క్లాసిక్ ప్రేమకథను తెరకెక్కించిన హను రాఘవపూడి ఈ చిత్రానికి దర్శకత్వం వహిస్తున్నారు. చరిత్రలో మరుగునపడిన ఓ సైనికుడి కథ ఆధారంగా ఈ పీరియడ్ ఫిల్మ్ తెరకెక్కుతోందని తెలుస్తోంది. ప్రభాస్‌ను మునుపెన్నడూ చూడని పాత్రలో చూపించేందుకు దర్శకుడు హను రాఘవపూడి పక్కా ప్రణాళికతో ఉన్నట్లు సమాచారం.

పుట్టినరోజున విడుదలైన ఈ పోస్టర్‌తో ఫ్యాన్స్‌లో ఉత్సాహం నెలకొంది. ప్రభాస్ పాత్ర ఎలా ఉండబోతోంది? కథా నేపథ్యం ఏంటి? అనే విషయాలు తెలుసుకోవడానికి విడుదల కాబోయే క్యారెక్టర్ ఇంట్రడక్షన్ వీడియో కోసం అందరూ ఆసక్తిగా ఎదురుచూస్తున్నారు.